Patik

hagbay ko na untang gikalimtan

ang sakit nga akong natagamtaman

niadtong hinahinay mong giukit

ang dagom sa akong panit

mapatik lamang nimo

ang imong ngalan

dinhi sa akong dughan

Hagbay ko na sad untang gikalimtan

Nga kalit ka lang nawagtang pagkahuman

Wala man lang ka nangutana

Kung pwede ba

Kung pwede ba kang mamisita

Sa laing balay

para mamatik ug dughan sa

lain nga babay

Imo ra kong gibyaan

samtang gahapdos pa ang akong dughan

Imo pa gyung giangkon ang tanan

Tanan nakong mga gipaningkamutan

Akong mga pangandoy ug katawa

akong hapsay nga panghunahuna

Ug ang mga tughay kong pang gabhion

Samtang kontento ra unta kong

magtan-aw niadto

sa kangitngit sa baybayon

Karon ania ka sa akong tugkaran

Nagluhod sa akong atubangan

Daghang pangutana ang midagan

Sa nagkayagaw kong hunahuna

Ug labaw sa tanan

Gusto tikang bawsan

Gusto tikang pasakitan

Himulbulan, patid-patiran

Patyun kung kinahanglan

Apan di ko ikalimod

Nga natulimbang gyud

ang akong kalibutan

sa imong wala'y

pagpananghid nga pagbalik

kay hinayhinay

mo na diay'ng gipangsubay

ang mga linya aning lubad nga patik

dinhi sa akong dughan